Былы супрацоўнік Веткаўскага музея стараабрадніцтва і беларускіх традыцый імя Шклярава, экскурсавод Аляксандр Нікіцін быў асуджаны да пазбаўлення волі па абвінавачванні ва ўдзеле ў пратэстах. Гэта вынікае з дадзеных Гомельскага абласнога суда, дзе 22 лістапада будуць разглядаць апеляцыю выраку суда Чыгуначнага раёна.
Нікіцін не раз даваў каментары дзяржаўнай прэсе. Фота: гарадская бібліятэка
Паводле «Вясны», Аляксандра асудзілі ў канцы верасня па ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Прысуд выносіў Дзяніс Кузенек, які стаў суддзём літаральна некалькі месяцаў таму. Прынамсі, у канцы траўня 2024 года Кузенек быў яшчэ стажорам суддзі.
Да гэтага ён шмат гадоў працаваў следчым. Паводле ўзгадак у дзяржаўнай прэсе, у 2017 годзе Кузенек быў начальнікам Гомельскага раённага аддзела Следчага камітэту, а як мінімум да пачатку 2023 года займаў пасаду начальніка Рэчыцкага РАСК, быў палкоўнікам юстыцыі. Відавочна, палітычная справа стала адной з першых, якую былы следчы вёў ужо ў якасці суддзі.
Дзяніс Кузенек. Фота: «Дняпровец»
Дакладны тэрмін, які ён прысудзіў Нікіціну, пакуль не называецца. Вядома, што да гэтага хлопца судзілі па адміністрацыйным артыкуле за падпіску на старонку, абвешчаную «экстрэмісцкай». Гэта адбылося ў пачатку траўня. З таго часу старонкі Аляксандра ў сацсетках не аднаўляюцца.
Верагодна, спачатку хлопца затрымалі за «падпіскі», а пры праверцы тэлефона маглі знайсці здымкі з пратэстаў 2020 года, за што ўрэшце ўзбудзілі крымінальную справу.
Аляксандра называлі «легендай Веткаўскага музею», «любімым экскурсаводам». Ён захапляўся краязнаўствам яшчэ з юнацтва, любіў бываць у экспедыцыях і збіраць старадаўнія рэчы. Некаторыя нават выкупляў за ўласныя грошы.
Апошні час Аляксандр не працаваў у музеі. Яго забралі ў войска ў канцы 2022 года, а пасля таго, як ён адслужыў, у музей не вяртаўся. Па звестках Флагштока, незадоўга да затрымання хлопец паспеў папрацаваць на дзяржаўным тэлебачанні. Да гэтага ён не раз даваў каментары дзяржаўнай прэсе.
Апеляцыю па справе Нікіціна ў абласным судзе будзе разглядаць старшыня судовай калегіі Васіль Бягун.